പരിശുദ്ധാത്മ അഭിഷേകത്തിനായുള്ള പ്രാർത്ഥന.

“പരിശുദ്ധാത്മാവ് നിങ്ങളുടെമേൽ വന്നു കഴിയുമ്പോൾ നിങ്ങൾ ശക്തി പ്രാപിക്കും. ഭൂമിയുടെ അതിർത്തികൾ വരെ നിങ്ങളെനിക്കു സാക്ഷികളായിരിക്കും” (നടപടി 1,8).

പിതാവായ ദൈവമേ, അങ്ങയുടെ പിയപുത്രനും ഞങ്ങളുടെ കർത്താവുമായ ഈശോമിശിഹായുടെ വാഗ്ദാനപ്രകാരം ഈശോയുടെ നാമത്തിൽ ഞാൻ യാചിക്കുന്നു, പരിശുദ്ധാത്മാവിന്റെ ശക്തമായ അഭിഷേകത്താൽ എന്നെ നിറക്കേണമേ. .

കർത്താവായ ഈശോയേ, അങ്ങയുടെ പ്രിയ അപ്പസ്തോലന്മാരിൽ പരിശുദ്ധാത്മാവിനെ വർഷിച്ചതു പോലെ എന്നിലും / ഞങ്ങളിലും അങ്ങയുടെ അഭിഷേകം നിറക്കേണമേ.

പരിശുദ്ധാത്മാവായ ദൈവമേ, ദൈവപിതാവിന്റെ മഹത്ത്വത്തിനായി ഈശോയുടെ നാമത്തിൽ യാചിക്കുന്നു. എന്നിൽ നിറയണമേ, ജ്വലിക്കണമേ, അഭിഷേകം നിറച്ച് നയിക്കണമേ. അങ്ങയുടെ വര6ങ്ങളും ഫലങ്ങളും എന്നിൽ നിറയ്ക്കണമേ (ഫലങ്ങൾക്കായി പ്രാർത്ഥിക്കാം).

പരിശുദ്ധാത്മാവേ, ദൈവസ്നേഹം എന്നിൽ നിറയ്ക്കണമേ

പരിശുദ്ധാത്മാവേ, ആനന്ദം എന്നിൽ നിറയ്ക്കണമേ

പരിശുദ്ധാത്മാവേ, ക്ഷമ എന്നിൽ നിറയ്ക്കണമേ

(ദയ, നന്മ, വിശ്വസ്തത, സൗമ്യത, ആത്മസംയമനം… ഇപ്രകാരം ഓരോ ഫലങ്ങൾക്കായും പ്രാർത്ഥിക്കുക).

ദാനങ്ങൾക്കായി പ്രാർത്ഥിക്കാം

പരിശുദ്ധാത്മാവേ ജ്ഞാനം എന്നിൽ നിറയ്ക്കണമേ

പരിശുദ്ധാത്മാവേ ബുദ്ധി എന്നിൽ നിറയ്ക്കണമേ

പരിശുദ്ധാത്മാവേ ആലോചന എന്നിൽ നിറയ്ക്കണമേ

(ഇപ്രകാരം അറിവ്, ആത്മശക്തി, ദൈവഭയം, ദൈവഭക്തി എന്നീ ദാനങ്ങൾക്കായി പ്രാർത്ഥിക്കുക).

വരങ്ങൾക്കായി പ്രാർത്ഥിക്കാം

പരിശുദ്ധാത്മാവേ വിശ്വാസവരം എനിക്കു നല്കണമേ

പരിശുദ്ധാത്മാവേ ജ്ഞാനത്തിന്റെ വരം എനിക്ക് നൽകണമേ

പരിശുദ്ധാത്മാവേ അറിവിന്റെ വരം എനിക്കു നൽകണമേ

പരിശുദ്ധാത്മാവേ രോഗശാന്തിവരം എനിക്കു നല്കണമേ

പരിശുദ്ധാത്മാവേ അത്ഭുതപ്രവർത്തനവരം എനിക്കു നല്കണമേ

പരിശുദ്ധാത്മാവേ ഭാഷാവരം എനിക്കു നല്കണമേ

പരിശുദ്ധാത്മാവേ പ്രവചനവരം എനിക്കു നല്കണമേ

പരിശുദ്ധാത്മാവേ ദർശനവരം എനിക്കു നല്കണമേ

പരിശുദ്ധാത്മാവേ വ്യാഖ്യാനവരം എനിക്കു നല്കണമേ

പരിശുദ്ധാത്മാവേ ആത്മാക്കളെ വിവേചിക്കാനും ബഹിഷ്കരിക്കാനുമുള്ള വരം എനിക്കു നല്കണമേ

പരിശുദ്ധാത്മാവേ പ്രാർത്ഥനാവരം എനിക്കു നല്കണമേ

പരിശുദ്ധാത്മാവേ ഉപദേശവരം എനിക്കു നല്കണമേ

ഏറ്റുചൊല്ലി പ്രാർത്ഥിക്കാം

ഈശോയുടെ വാഗ്ദാനമായ പരിശുദ്ധാത്മാവേ എന്നിൽ നിറയണമേ

ആദിയിൽ ആഴിക്കുമേൽ ചലിച്ചുകൊണ്ടിരുന്ന പരിശുദ്ധാത്മാവേ എന്നിൽ നിറയണമേ

ഏലീശായിൽ നിറഞ്ഞ പരിശുദ്ധാത്മാവേ എന്നിൽ നിറയണമേ

സാംസണിൽ നിറഞ്ഞ പരിശുദ്ധാത്മാവേ എന്നിൽ നിറയണമേ

ദാനിയേലിൽ നിറഞ്ഞ പരിശുദ്ധാത്മാവേ എന്നിൽ നിറയണമേ

ദാവീദിൽ നിറഞ്ഞ പരിശുദ്ധാത്മാവേ എന്നിൽ നിറയണമേ

പരി.അമ്മയിൽ നിറഞ്ഞ പരിശുദ്ധാത്മാവേ എന്നിൽ നിറയണമേ

ശ്ലീഹന്മാരെ ശക്തിപ്പെടുത്തിയ പരിശുദ്ധാത്മാവേ എന്നിൽ നിറയണമേ

പ്രപഞ്ചത്തിനു മീതേ ചലിച്ചുകൊണ്ടിരുന്ന പരിശുദ്ധാത്മാവേ എന്നിൽ നിറയണമേ

എല്ലാ കാര്യങ്ങളും ഞങ്ങളെ പഠിപ്പിക്കുന്ന പരിശുദ്ധാത്മാവേ എന്നിൽ നിറയണമേ

പാപബോധം നൽകുന്ന പരിശുദ്ധാത്മാവേ എന്നിൽ നിറയണമേ

നീതിബോധം നൽകുന്ന പരിശുദ്ധാത്മാവേ എന്നിൽ നിറയണമേ

ന്യായവിധിയെക്കുറിച്ചു ബോധ്യം തരുന്ന പരിശുദ്ധാത്മാവേ എന്നിൽ നിറയണമേ

ദൈവവചനം അനുസ്മരിപ്പിക്കുന്ന പരിശുദ്ധാത്മാവേ എന്നിൽ നിറയണമേ

പരിശുദ്ധ അമ്മ ഫാ. സ്റ്റെഫാനോഗോബി വഴി പഠിപ്പിച്ച പരിശുദ്ധാത്മാഭിഷേകത്തിനായുള്ള പ്രാർത്ഥന

പരിശുദ്ധാത്മാവേ, എഴുന്നള്ളി വരേണമേ, അങ്ങയുടെ പ്രിയ മണവാട്ടിയായ പരിശുദ്ധ മറിയത്തിന്റെ വിമലഹൃദയത്തിന്റെ ശക്തമായ മദ്ധ്യസ്ഥതയാൽ എഴുന്നള്ളി വരേണമേ, ഞങ്ങളിൽ വന്നുവസിക്കണമേ.

പരിശുദ്ധ അമ്മ ആംസ്റ്റർഡാമിൽ വച്ചു പഠിപ്പിച്ച പരിശുദ്ധാത്മാഭിഷേകത്തിനായുള്ള പ്രാർത്ഥന

കർത്താവായ യേശുവേ, പിതാവിന്റെ പുത്രാ, അങ്ങയുടെ അരൂപിയെ ഇപ്പോൾ ഭൂമിയിലേയ്ക്ക് അയക്കേണമേ. എല്ലാ ജനപഥങ്ങളുടെയും ഹൃദയത്തിൽ പരിശുദ്ധാത്മാവ് വസിക്കട്ടെ. അതുവഴി ധാർമ്മികാ ധഃപതനം, ദുരന്തങ്ങൾ, യുദ്ധം ഇവയിൽ നിന്ന് അവർ സംരക്ഷിക്കപ്പെടട്ടെ. സർവ്വ ജനപഥങ്ങളുടെയും നാഥയായി പരിശുദ്ധ കന്യാമറിയം ഞങ്ങളുടെ മധ്യസ്ഥയായിരിക്കട്ടെ. ആമ്മേൻ.

പ്രതിദിനമുള്ള പരിശുദ്ധാത്മ പ്രാർത്ഥന

പരിശുദ്ധാത്മാവായ ദൈവമേ, എന്റെ ആത്മാവിന്റെ ആനന്ദമേ,

ഞാനങ്ങയെ ആരാധിക്കുന്നു, സ്‌തുതിക്കുന്നു എന്നെ പ്രകാശിപ്പിക്കുകയും ശക്തിപ്പെടുത്തുകയും

നേരായ വഴിക്ക് നയിക്കുകയും ചെയ്യണമെ. എന്റെ ആത്മാവിന്റെ സാന്ത്വനമേ, ഞാനങ്ങയെ വാഴ്ത്തുന്നു. പരിശുദ്ധാത്മാവായ ദൈവമേ, എന്നെ സംബന്ധിച്ചുള്ള പിതാവിന്റെ തിരുവുള്ളം എന്താണെന്ന് എന്ന ബോധ്യപ്പെടുത്തണമെ. അവ നിർവഹിക്കുവാൻ എന്നെ സഹായിക്കണമെ. അവിടുത്തെ ദിവ്യപ്രചോദനങ്ങൾക്ക് വിധേയനായ എന്റെ ജീവിതത്തിൽ സംഭവിക്കുതെന്തിനും ആമ്മേൻ പറഞ്ഞ് സാഹ്‌ളാദം ജീവിക്കാൻ എന്നെ സഹായിക്കണമെ. പരിശുദ്ധാത്മാവായ ദൈവമേ സ്തുതി.

(പ്രതിദിനം, അഞ്ചുമിനിറ്റെങ്കിലും സ്വര്യമായി ഒരിടത്ത് ശാന്തമായിരുന്ന്, കണ്ണുകളടച്ച്, ആത്മാവിന്റെ ആന്തരികത – യിലേക്ക് ആഴ്ന്നിറങ്ങി, അവിടെ വസിക്കുന്ന പരിശുദ്ധാത്മാ വിനെ ധ്യാനിച്ച് ഈ പ്രാർത്ഥന ചൊല്ലുക. ജീവിതത്തിൽ അത്ഭുതകരമായ അനുഭവം ഉണ്ടാകും.

പരിശുദ്ധാരൂപിക്ക് പ്രതിഷ്ഠാജപം

പരിശുദ്ധ ത്രിത്വത്തിന്‍റെ മൂന്നാമാളും, പിതാവിൽനിന്നും പുത്രനിൽനിന്നും പുറപ്പെടുന്നവനും, എല്ലാത്തിലും അവർക്കു തുല്ല്യനും സത്യത്തിന്‍റെയും സ്നേഹത്തിന്‍റെയും അരൂപിയുമായ റൂഹാദ്ക്കുദശാതമ്പുരാനെ! എത്രയും വലിയഎളിമവണക്കത്തോടുകൂടി അങ്ങയെ ഞാനാരാധിക്കുന്നു. മാലാഖമാരിൽ നിന്നും പരിശുദ്ധന്മാരിൽ നിന്നും നീ കൈക്കൊള്ളുന്ന സ്തുതിയാരാധനകളോട് എന്‍റെതിനേയും ചേർത്ത് നിന്നെ ഞാൻ വാഴ്ത്തുന്നു. നീ ലോകത്തിന് നല്കിയതും നിരന്തരം നല്കിവരുന്നതുമായ എല്ലാ മനോഗുണങ്ങളെപ്രതിയും ഹൃദയപൂർവ്വം നിനക്ക് ഞാൻ സ്തോത്രം ചൊല്ലുന്നു.

എന്‍റെ ഓർമ്മ, ബുദ്ധി, മനസ്സ്,ഹൃദയം മുതലായി എനിക്കുള്ളതെല്ലാം ഇന്നും എന്നേയ്ക്കുമായി നിനക്കു ഞാൻ കാഴ്ച വയ്ക്കുന്നു. എന്‍റെ മുഴുവൻ ഹൃദയത്തോടുകൂടി നിന്നെ ഞാൻ സ്നേഹിക്കുന്നു. നീ എല്ലാ നന്മകളുടെയും ദാനങ്ങളുടെയും കാരണഭൂതനാകുന്നു. നീ നിന്‍റെ എല്ലാ വരപ്രസാദങ്ങളോടുംകൂടി എന്നെ സന്ദർശിക്കേണമെ. നിന്‍റെ സ്വർഗ്ഗീയപ്രേരണകൾക്കും, നീ ഭരിച്ചു നടത്തുന്ന വിശുദ്ധസഭയുടെ ഉപദേശങ്ങൾക്കും എന്‍റെ മനസ്സ് എപ്പോഴും അനുസരണയുള്ളതായിരിക്കട്ടെ. ദൈവസ്നേഹത്താലും പരസ്നേഹത്താലും എന്‍റെ ഹൃദയം എപ്പോഴും എരിയട്ടെ. ദൈവതിരുമനസ്സിനോട് എന്‍റെ മനസ്സ് എല്ലാക്കാര്യങ്ങളിലും അനുരൂപമായിരിക്കട്ടെ.

എന്‍റെ ജീവിതം മുഴുവനും ഈശോമിശിഹായുടെ ജീവിതത്തിന്‍റെ യും പുണ്യങ്ങളുടെയും വിശ്വസ്ത അനുകരണമായിരിക്കട്ടെ.

എന്‍റെ അന്തസ്സിന്‍റെ കടങ്ങൾ നിറവേറ്റുവാനുള്ള വശങ്ങളും പുണ്യങ്ങളും നീ എനിക്കു തരേണമെ. വിശ്വാസവും,ശരണവും,ഉപവിയും എന്നിൽ വർദ്ധിപ്പിക്കേണമെ. നല്ല വ്യാപാരത്തിനുള്ള പ്രധാന പുണ്യങ്ങളും, നിന്‍റെ ഏഴു ദിവ്യദാനങ്ങളും, പന്ത്രണ്ടു ഫലങ്ങളും എനിക്കു നീ നല്കേണമെ. ഞാൻ പരീക്ഷയിൽ ഉൾപ്പെടുവാൻ ഒരുനാളും നീ അനുവദിക്കല്ലെ. പിന്നെയോ, ഇന്ദ്രിയങ്ങൾക്കു ജ്ഞാനപ്രകാശം നല്കി,എനിക്കു വഴികാട്ടിയായിരുന്ന്, സകല തിന്മയിൽനിന്നും ഞാൻ ഒഴിവാൻ കൃപചെയ്തരുളണമേ.

ഈ അനുഗ്രഹങ്ങളെല്ലാം എനിക്കും, ആർക്കെല്ലാം വേണ്ടി ഞാനപേക്ഷിപ്പാൻ നീ തിരുമനസ്സായിരിക്കുന്നുവോ അവർക്കും നീ നല്കിയരുളണമേ. നീ വഴിയായ് പിതാവിനെയും പുത്രനെയും ഇവരിരുവരുടേയും അരൂപിയായ നിന്നെയും ഞങ്ങൾ അറിഞ്ഞ് സ്നേഹിച്ച്, ഇപ്പോഴും എപ്പോഴും നിങ്ങൾക്കു സ്തോത്രം പാടുവാൻ നീ അനുഗ്രഹം ചെയ്യണമെ എന്ന് ഞങ്ങളുടെ കർത്താവീശോമിശിഹായെക്കുറിച്ച് അങ്ങയോടു ഞങ്ങൾ പ്രാർത്ഥിക്കുന്നു.

ആമ്മേൻ.

പരിശുദ്ധാത്മ അഭിഷേകത്തിനായുള്ള പ്രാർത്ഥന.

1. പരിശുദ്ധാത്മാവേ ഞാൻ അങ്ങയെ ആരാധിക്കുന്നു. നന്ദി പറയുന്നു. എന്തെന്നാൽ അങ്ങ് പിതാവായ ദൈവത്തിന്റെ ആത്മാവും എന്റെ കർത്താവും രക്ഷകനും ദൈവപുത്രനുമായ യേശുക്രിസ്തുവിന്റെ ആത്മാവും ആണ്.

2. പരിശുദ്ധാത്മാവേ ഞാൻ അങ്ങയെ ആരാധിക്കുന്നു. സ്തുതിക്കുന്നു. എന്തെന്നാൽ അങ്ങ് എന്റെ കർത്താവാണ്, എന്റെ സൂക്ഷിപ്പുകാരനാണ്, എന്റെ ശക്തിയാണ്, എന്നെ നയിക്കുന്നവനാണ്, എന്റെ ശ്രോതസ്സാണ്, എന്റെ ജ്ഞാനമാണ്, എന്റെ ആരോഗ്യമാണ്, എന്റെ മഹത്വമാണ്, എന്റെ സംരക്ഷകനാണ്, എന്റെ ജീവനാണ്, എന്റെ സംഭാരകനാണ്.

3. പരിശുദ്ധാത്മാവേ ഞാൻ അങ്ങയെ ആരാധിക്കുന്നു, സ്തുതിക്കുന്നു, എന്തെന്നാൽ നീ എന്റെ സഹായകനാണ്. നീ എന്റെ ഉപദേഷ്ടാവാണ്. എന്റെ അഭിഭാഷകനാണ്, എന്റെ ആശ്വാസദായകനാണ്, എന്റെ കാവൽക്കാരനാണ്, എന്റെ കൂട്ടുകാരനാണ്, എന്റെ മാദ്ധ്യസ്ഥനാണ്.

4. ഓ, പരിശുദ്ധാത്മാവേ അങ്ങ് ത്രിയേക ദൈവത്തിലെ മൂന്നാമത്തെ വ്യക്തിയാണ്. പിതാവിൽ നിന്നും പുത്രനിൽ നിന്നും പുറപ്പെടുന്ന അങ്ങ് സത്യത്തിന്റെ ആത്മാവാണ്, സ്നേഹത്തിന്റെ ആത്മാവാണ്, വിശുദ്ധിയുടെ ആത്മാവാണ്.

5. പിതാവിൽ നിന്നും പുത്രനിൽ നിന്നും പുറപ്പെടുന്ന എല്ലാ കാര്യങ്ങളിലും അവർക്ക് സമനാണ്. പൂർണ്ണ ഹൃദയത്തോടെ ഞാൻ അങ്ങയെ ആരാധിക്കുന്നു, സ്തുതിക്കുന്നു. ആരാണോ എന്നെ സൃഷ്ടിച്ചത്, ആർക്കുവേണ്ടിയാണോ ഞാൻ സൃഷ്ടിക്കപ്പെട്ടത് ആ ദൈവത്തെ അന്വോഷിക്കുവാനും, അറിയുവാനും എന്നെ പഠിപ്പിക്കണമേ. ആ ദൈവത്തോടുള്ള വലിയ സ്നേഹത്തിലും, ദൈവഭയത്താലും എന്റെ ഹൃദയത്തെ നിറയ്ക്കണമേ. അനുതാപവും ക്ഷമയും എനിക്കു നൽകണമേ. പാപത്തിൽ വീഴാൻ എന്നെ അനുവദിക്കരുതേ.

6. പരിശുദ്ധാത്മാവേ ഞാൻ അങ്ങേയ്ക്കു നന്ദി പറയുന്നു. എന്തെന്നാൽ നിന്റെ സാന്നിദ്ധ്യവും ശക്തിയും എപ്പോഴും എന്നോടു കൂടെയുണ്ട്. നന്ദി കർത്താവേ എന്തെന്നാൽ അങ്ങയുടെ സാന്നിദ്ധ്യവും, ശക്തിയും, കരുണയും, കൃപയും, അനുഗ്രഹവും എന്നെ വിട്ടുപോയിട്ടില്ല.

7. പരിശുദ്ധാത്മാവേ, ഞാൻ അങ്ങേയ്ക്ക് നന്ദിപറയുന്നു. എന്തെന്നാൽ എന്റെ ശരീരം സമ്പൂർണ്ണമായും അങ്ങയുടെ ആലയമാണ്, അങ്ങയുടെ സാന്നിദ്ധ്യം എന്നിൽ സമൃദ്ധമായി വസിക്കുകയും ചെയ്യുന്നു.

8. പരിശുദ്ധാത്മാവേ ഞാൻ അങ്ങേയ്ക്കു നന്ദി പറയുന്നു. എന്തെന്നാൽ അങ്ങ് പിതാവിൽ നിന്നു ലഭിച്ച കൃപയുടെ സമൃദ്ധിയാണ്, നീതിയുടെ ദാനമാണ്.

9. പരിശുദ്ധാത്മാവേ ഞാൻ അങ്ങേയ്ക്കു നന്ദിപറയുന്നു, എന്തെന്നാൽ നിന്റെ സാന്നിദ്ധ്യവും ശക്തിയും എന്നിൽ പ്രവർത്തിക്കുന്നു. ദൈവത്തിന്റെ നീതിയിലും, ചട്ടങ്ങളിലും നടക്കാനും; ന്യായവിധികൾ ചെയ്യാനും പ്രേരിപ്പിക്കുന്നു.

10. പരിശുദ്ധാത്മാവേ ഞാൻ അങ്ങേയ്ക്കു നന്ദിപറയുന്നു, എന്തെന്നാൽ ദൈവത്തോടും മനുഷ്യരോടും സ്നേഹത്തിൽ നടക്കുന്നതിന് ശ്രദ്ധാലുക്കളാക്കുന്നു.

11. പരിശുദ്ധാത്മാവേ ഇന്നത്തെ ദിവസം എന്നെ സഹായിക്കണമേ. പരിശുദ്ധാത്മാവേ എന്റെ ഭാവനകളെയും ചിന്തകളെയും നയിക്കുകയും പ്രചോദിപ്പിക്കുകയും ചെയ്യണമേ.

12.പരിശുദ്ധാത്മാവേ, എന്റെ തിരഞ്ഞെടുപ്പുകളും, പ്രവർത്തനങ്ങളും, വികാരങ്ങളും, സ്വഭാ വങ്ങളും ആഗ്രഹങ്ങളും പ്രചോദിപ്പിക്കുകയും നയിക്കുകയും ചെയ്യണമേ. പരിശുദ്ധാത്മാവേ, – എന്റെ ചുവടുകളെ ക്രമീകരിക്കുകയും ഞാൻ പോകേണ്ട വഴിയിലൂടെ എന്നെ നയിക്കുകയും ചെയ്യണമേ. പരിശുദ്ധാത്മാവേ, നിന്റെ സ്വരം തിരിച്ചറിയുവാനും, അനുസരിക്കുവാനും എന്നെ സഹായിക്കണമേ.

13.പരിശുദ്ധാത്മാവേ, നിന്റെ സ്വരം മനസിലാക്കാനും അനുസരിക്കുവാനും എന്നെ പ്രേരിപ്പിക്കണമേ എന്നു ഞാൻ പ്രാർത്ഥിക്കുന്നു.

14.പരിശുദ്ധാത്മാവേ, ഇന്ന് സ്വർഗ്ഗം എന്നോട് എന്താണ് പറയുന്നത് എന്ന് അറിയാൻ എന്നെ സഹായിക്കണമേ.

15. എന്റെ ചിന്തകളെല്ലാം വിശുദ്ധമാക്കേണ്ടതിന് പരിശുദ്ധാത്മാവേ എന്നിൽ നിശ്വസിക്കുക. എന്റെ പ്രവർത്തനങ്ങളെല്ലാം വിശുദ്ധമാക്കേണ്ടതിന് പരിശുദ്ധാത്മാവേ എന്നിൽ ചലിക്ക ണമേ . വിശുദ്ധമായവയെ മാത്രം സ്നേഹിക്കുവാൻ പരിശുദ്ധാത്മാവേ എന്റെ ഹൃദയത്തെ ആകർഷിക്കണമേ. വിരുദ്ധമായവയെ പ്രതിരോധിക്കുവാൻ പരിശുദ്ധാത്മാവേ എന്നെ ശക്തിപ്പെടുത്തണമേ. ഞാൻ എപ്പോഴും വിശുദ്ധമായിരിക്കുവാൻ പരിശുദ്ധാത്മാവേ എന്നെ സംരക്ഷിക്കണമേ.

16. പരിശുദ്ധാത്മാവേ, ഞാൻ അങ്ങേയ്ക്ക് നന്ദിപറയുന്നു. എന്തെന്നാൽ എന്നിലുള്ള അങ്ങയുടെ സാന്നിദ്ധ്യവും ശക്തിയും ദുഷ്ടതയിൽ നിന്നും എന്നെ സംരക്ഷിക്കുന്നു. എനിക്ക് എതിരായി ഉണ്ടാക്കിയിട്ടുള്ള ഒരായുധവും ഫലദായകമാവുകയില്ല.

17.പരിശുദ്ധാത്മാവേ, ഞാൻ അങ്ങേയ്ക്കു നന്ദി പറയുന്നു. കാരണം, ദൈവത്തിന്റെ പ്രകാശം എന്നെ വലയം ചെയ്തിരിക്കുന്നു, ദൈവസ്നേഹം എന്നെ പൊതിയുന്നു, ദൈവശക്തി – എന്നെ സംരക്ഷിക്കുന്നു, ദൈവസാന്നിദ്ധ്യം എന്നെ നിരീക്ഷിക്കുന്നു. ഞാൻ എവിടെയായാലും എവിടെ പോയാലും ദൈവം എന്റെ കൂടെയുണ്ട്.

18. അല്ലയോ, പരിശുദ്ധാത്മാവേ, എന്റെ ആത്മാവിന്റെ ആത്മാവേ, ഞാൻ അങ്ങയെ ആരാ ധിക്കുന്നു. എന്നെ ബോധദീപ്തമാക്കണമേ, നയിക്കണമേ, ശക്തിപ്പെടുത്തണമേ. ഞാൻ എന്തു ചെയ്യണമെന്ന് എന്നോട് പറയണമേ. അതു ചെയ്യാൻ എന്നോട് കൽപിക്കണമേ. എന്റെ ജീവിതത്തിൽ സംഭവിക്കാൻ അനുവദിക്കുന്ന എല്ലാറ്റിനും കീഴ്വഴങ്ങുമെന്ന് ഞാൻ ഉറപ്പേകുന്നു. അങ്ങയുടെ തിരുവിഷ്ടം മാത്രം എനിക്കു കാണിച്ചു തരണമേ.

19. പരിശുദ്ധാത്മാവേ, എനിക്ക് അനുതാപവും പാപബോധവും നല്കണമേ. വിശുദ്ധിയിൽ എന്നെ സന്ദർശിക്കണമേ. യേശുനാമത്തിൽ ഞാൻ പ്രാർത്ഥിക്കുന്നു.

20. പരിശുദ്ധാത്മാവേ, ഞാൻ അങ്ങയെ ആരാധിക്കുന്നു, പരിശുദ്ധാത്മാവേ ഞാൻ അങ്ങയെ സ്തുതിക്കുന്നു, പരിശുദ്ധാത്മാവേ, ഞാൻ അങ്ങേയ്ക്ക് യേശുക്രിസ്തുവിന്റെ ശക്തമായ നാമത്തിൽ നന്ദിപറയുന്നു. ആമ്മേൻ

പരിശുദ്ധാത്മാവിന്‍റെ ജപമാല

വിശ്വാസപ്രമാണം

1. സ്വർഗ്ഗ 1.നന്മ 1.ത്രിത്വ .

“ പരിശുദ്ധാത്മാവ് നിന്‍റെ മേൽ വരും, അത്യുന്നതന്‍റെ ശക്തി നിന്‍റെ മേൽ ആവസിക്കും ” ആമേൻ. ( ലൂക്ക 1:35 )

1. യേശുവിൻറെ വാഗ്ദാനമായ പരിശുദ്ധാത്മാവേ, ഞങ്ങളിൽ വന്നു നിറയണമേ . ( 10 പ്രാവശ്യം ) 1.ത്രിത്വ .

2. യേശുവിൻറെ വാഗ്ദാനമായ പരിശുദ്ധാത്മാവേ, ഞങ്ങളെ നയിക്കണമേ. ( 10 പ്രാവശ്യം ) 1.ത്രിത്വ .

3. യേശുവിൻറെ വാഗ്ദാനമായ പരിശുദ്ധാത്മാവേ, ഞങ്ങളെ ശുദ്ധീകരിക്കണമേ. ( 10 പ്രാവശ്യം ) 1.ത്രിത്വ .

4. യേശുവിൻറെ വാഗ്ദാനമായ പരിശുദ്ധാത്മാവേ, ഞങ്ങളെ ഉജ്ജ്വലിപ്പിക്കണമേ. ( 10 പ്രാവശ്യം ) 1.ത്രിത്വ .

5. യേശുവിൻറെ വാഗ്ദാനമായ പരിശുദ്ധാത്മാവേ , അങ്ങേ വരദാനഫലങ്ങളാൽ ഞങ്ങളെ നിറയ്ക്കണമേ. ( 10 പ്രാവശ്യം ) 1.ത്രിത്വ .

പരിശുദ്ധാത്മാവേ, എഴുന്നള്ളി വരണമേ, അങ്ങയുടെ വത്സലമണവാട്ടിയായ പരിശുദ്ധ കന്യകാ മറിയത്തിൻറെ വിമലഹൃദയത്തിൻറെ ശക്തമായ മദ്ധ്യസ്ഥതയാൽ ഞങ്ങളുടെ മേൽ എഴുന്നള്ളി വരണമേ, ഞങ്ങളിൽ വന്നു വസിക്കണമേ .

പരിശുദ്ധാത്മാവിന്‍റെ ലുത്തിനിയ

കർ‍ത്താവേ, അനുഗ്രഹിക്കണമേ

മിശിഹായേ, അനുഗ്രഹിക്കണമേ

മിശിഹായേ, ഞങ്ങളുടെ പ്രാര്‍ത്ഥന കേൾക്കണമേ

മിശിഹായേ, ഞങ്ങളുടെ പ്രാര്‍ത്ഥന കൈക്കൊള്ളണമേ

സ്വര്‍ഗ്ഗസ്ഥനായ പിതാവായ ദൈവമേ,
ഞങ്ങളെ അനുഗ്രഹിക്കണമേ

ഭൂലോക രക്ഷിതാവായ പുത്രനായ ദൈവമേ, ഞങ്ങളെ അനുഗ്രഹിക്കണേ

പരിശുദ്ധാത്മാവായ ദൈവമേ,
ഞങ്ങളെ അനുഗ്രഹിക്കണമേ

ഏക ദൈവമായ പരിശുദ്ധ ത്രിത്വമേ,
ഞങ്ങളെ അനുഗ്രഹിക്കണമേ

പിതാവിനോടും പുത്രനോടും സമനായ പരിശുദ്ധാത്മാവേ,
ഞങ്ങളില്‍ വന്നു നിറയേണമേ

പിതാവിന്‍റെ വാഗ്ദാനമായ പരിശുദ്ധാത്മാവേ,
ഞങ്ങളില്‍ വന്നു നിറയേണമേ

ദൈവത്തിന്‍റെ ദാനമായ പരിശുദ്ധാത്മാവേ,
ഞങ്ങളില്‍ വന്നു നിറയേണമേ

ഭൂമുഖം നവീകരിക്കുന്ന പരിശുദ്ധാത്മാവേ,
ഞങ്ങളില്‍ വന്നു നിറയേണമേ

പ്രാവിന്‍റെ രൂപത്തില്‍‌ ഈശോയുടെമേല്‍ ഇറങ്ങിവന്ന പരിശുദ്ധാത്മാവേ, ഞങ്ങളില്‍ വന്നു നിറയേണമേ

പരിശുദ്ധ അമ്മയില്‍ നിറഞ്ഞുനിന്ന പരിശുദ്ധാത്മാവേ,
ഞങ്ങളില്‍ വന്നു നിറയേണമേ

പന്തക്കുസ്താ ദിവസം ശ്ലീഹന്മാരുടെമേല്‍ ആവസിച്ച് അവരെ ശക്തിപ്പെടുത്തിയ പരിശുദ്ധാത്മാവേ, ഞങ്ങളില്‍ വന്നു
നിറയേണമേ

ആദിമ ക്രൈസ്തവ സമൂഹത്തില്‍ നിറഞ്ഞുനിന്ന പരിശുദ്ധാത്മാവേ,
ഞങ്ങളില്‍ വന്നു നിറയേണമേ

അടയാളങ്ങളും അദ്ഭുതങ്ങളും പ്രവർത്തിക്കുന്ന പരിശുദ്ധാത്മാവേ,
ഞങ്ങളില്‍ വന്നു നിറയേണമേ

യേശുവിന്‍റെ സാക്ഷികളാകാന്‍ ഞങ്ങളെ പഠിപ്പിക്കുന്ന പരിശുദ്ധാത്മാവേ, ഞങ്ങളില്‍ വന്നു നിറയേണമേ

തിരുവചനത്താല്‍ ഞങ്ങളെ വിശുദ്ധീകരിക്കുന്ന പരിശുദ്ധാത്മാവേ,
ഞങ്ങളില്‍ വന്നു നിറയേണമേ

സഭയില്‍ നിര‌ന്തരം വസിക്കുന്ന പരിശുദ്ധാത്മാവേ ,
ഞങ്ങളില്‍ വന്നു നിറയേണമേ

കൂദാശയിലൂടെ ഞങ്ങളെ ശക്തിപ്പെടുത്തുന്ന പരിശുദ്ധാത്മാവേ,
ഞങ്ങളില്‍ വന്നു നിറയേണമേ

പ്രാര്‍ത്ഥിക്കുവാന്‍ ഞങ്ങളെ പഠിപ്പിക്കുന്ന പരിശുദ്ധാത്മാവേ,
ഞങ്ങളില്‍ വന്നു നിറയേണമേ

പ്രലോഭനങ്ങളെ അതിജീവിക്കുവാന്‍ ശക്തിതരുന്ന പരിശുദ്ധാത്മാവേ, ഞങ്ങളില്‍ വന്നു നിറയേണമേ

ഞങ്ങള്‍ക്ക് പാപബോധം തരുന്ന പരിശുദ്ധാത്മാവേ,
ഞങ്ങളില്‍ വന്നു നിറയേണമേ

ഞങ്ങള്‍ക്ക് നീതിബോധം തരുന്ന പരിശുദ്ധാത്മാവേ,
ഞങ്ങളില്‍ വന്നു നിറയേണമേ

ന്യായവിധിയെക്കുറിച്ച് ഞങ്ങളെ ബോധ്യപ്പെടുത്തുന്ന പരിശുദ്ധാത്മാവേ, ഞങ്ങളില്‍ വന്നു നിറയേണമേ

സത്യത്തിന്‍റെ പൂര്‍ണതയിലേക്ക് ഞങ്ങളെ നയിക്കുന്ന പരിശുദ്ധാത്മാവേ, ഞങ്ങളില്‍ വന്നു നിറയേണമേ

ഞങ്ങള്‍ക്ക് സമൃദ്ധമായി ജീവന്‍ തരുന്ന പരിശുദ്ധാത്മാവേ,
ഞങ്ങളില്‍ വന്നു നിറയേണമേ

ബോധജ്ഞാനത്തിന്‍റെ അരൂപിയായ പരിശുദ്ധാത്മാവേ,
ഞങ്ങളെ നയിക്കേണമേ…

ജ്ഞാനത്താല്‍ നിറയ്ക്കുന്ന പരിശുദ്ധാത്മാവേ,
ഞങ്ങളെ നയിക്കേണമേ.

ബുദ്ധിയുടെ ദിവ്യപ്രകാശമായ പരിശുദ്ധാത്മാവേ,
ഞങ്ങളെ നയിക്കേണമേ…

വിവേകത്തിന്‍റെ ഉറവിടമായ പരിശുദ്ധാത്മാവേ,
ഞങ്ങളെ നയിക്കേണമേ…

ആത്മശക്തിയുടെ കതിരുകൾ ഏകുന്ന പരിശുദ്ധാത്മാവേ,
ഞങ്ങളെ നയിക്കേണമേ

അറിവിന്‍റെ പ്രകാശമായ പരിശുദ്ധാത്മാവേ,
ഞങ്ങളെ നയിക്കേണമേ…

ഭക്തിയുടെ ചൈതന്യമാകുന്ന പരിശുദ്ധാത്മാവേ,
ഞങ്ങളെ നയിക്കേണമേ…

ദൈവഭയത്തിന്‍റെ പ്രതീകമാകുന്ന പരിശുദ്ധാത്മാവേ,
ഞങ്ങളെ നയിക്കേണമേ

വിശ്വാസത്തിന്‍റെയും,പ്രത്യാശയുടെയും ആത്മാവേ ,
ഞങ്ങളേ വിശുദ്ധികരിക്കേണമേ

സ്നേഹത്തിന്‍റെയും, സന്തോഷത്തിന്‍റെയും
ആത്മാവേ , ഞങ്ങളേ വിശുദ്ധികരിക്കേണമേ

സമാധാനത്തിന്‍റെയും,ക്ഷമയുടെയും ആത്മാവേ,
ഞങ്ങളേ വിശുദ്ധികരിക്കേണമേ

ദയയുടെയും, നന്മയുടെയും
ആത്മാവേ, ഞങ്ങളേ വിശുദ്ധികരിക്കേണമേ

വിശ്വസ്തതയുടെയും, സൗമ്യതയുടെയും, ആത്മസംയമനത്തിന്‍റെയും ആത്മാവേ, ഞങ്ങളേ വിശുദ്ധികരിക്കേണമേ

എളിമയുടെയും, ഐക്യത്തിന്‍റെയും ആത്മാവേ,
ഞങ്ങളേ വിശുദ്ധികരിക്കേണമേ

വിശുദ്ധിയുടെയും, ദൈവമക്കളുടെയും ആത്മാവേ,
ഞങ്ങളേ വിശുദ്ധികരിക്കേണമേ

തിരുസഭയുടെ സംരക്ഷകനെ, ദൈവകൃപകളുടെ ഉറവിടമേ
ഞങ്ങളേ വിശുദ്ധികരിക്കേണമേ

വേദനകളുടെ ആശ്വാസമേ
ഞങ്ങളേ വിശുദ്ധികരിക്കേണമേ

നിത്യമായ പ്രകാശമേ, ജീവന്‍റെ ഉറവയെ,
ഞങ്ങളേ വിശുദ്ധികരിക്കേണമേ

ഞങ്ങളുടെ ആത്മാവിന്‍റെ അഭിഷേകമേ, മാലാഖമാരുടെ സന്തോഷമേ, ഞങ്ങളേ വിശുദ്ധികരിക്കേണമേ

പ്രവാചകന്മാരുടെ പ്രചോദനമേ,
അപ്പൊസ്തോലന്മാരുടെ അധ്യാപകനെ,
ഞങ്ങളേ വിശുദ്ധികരിക്കേണമേ

രക്തസാക്ഷികളുടെ ശക്തികേന്ദ്രമേ,
സകല വിശുദ്ധരുടേയും ആനന്ദമേ,
ഞങ്ങളേ വിശുദ്ധികരിക്കേണമേ

കരുണാമയനായ പരിശുദ്ധാത്മാവേ,
ഞങ്ങളുടെമേല്‍ കനിയണമേ

കരുണാമയനായ പരിശുദ്ധാത്മാവേ, ഞങ്ങളുടെ പ്രാര്‍ത്ഥന കേള്‍ക്കേണമേ

കരുണാമയനായ പരിശുദ്ധാത്മാവേ, ഞങ്ങളേ അനുഗ്രഹിക്കണേ

പ്രാര്‍ത്ഥിക്കാം

പിതാവിനോടും പുത്രനോടും ,സമനായ ദൈവവും സകലത്തെയും പവിത്രികരിക്കുന്ന ആശ്വാസദായകനുമായ പരിശുദ്ധാത്മാവേ,
അങ്ങേ ദാസരായ ഞങ്ങളുടെ ഹൃദയങ്ങളെ അങ്ങ് പവിത്രീകരിക്കണമേ. അങ്ങ് ഉന്നതനായ ദൈവത്തിന്‍റെ ദാനവും,ജീവനുള്ള ഉറവയും, അഗ്നിയും, സ്നേഹവും ,ആത്മീയ അഭിഷേകവുമാകുന്നു.അങ്ങ് പിതാവായ ദൈവത്തിന്‍റെ വാഗ്ദാനവും , ഏഴുവിധ ദാനങ്ങളോടു കൂടിയവനുമാകുന്നു. അങ്ങേ ദാനങ്ങളാലും, വരങ്ങളാലും, ഫലങ്ങളാലും ഞങ്ങളെ സമ്പന്നരാക്കണമേ. വിചാരങ്ങളില്‍ നൈര്‍മല്യവും, സംസാരത്തില്‍ വിനയവും, പ്രവര്‍ത്തികളില്‍ വിവേകവും, ഞങ്ങള്‍ക്ക് പ്രദാനം ചെയ്യണമേ. ക്ലേശങ്ങളില്‍ സ്ഥൈരൃവും, സംശയങ്ങള്‍ അകറ്റാന്‍ വിശ്വാസവും, ജീവിത നൈരാശ്യങ്ങളിൽ പ്രത്യാശയും, മറ്റുള്ളവരില്‍ അങ്ങയെ ദര്‍ശിക്കുവാന്‍ സ്നേഹവും ഞങ്ങള്‍ക്ക് പ്രദാനം ചെയ്യണമേ.

സർവശക്തനായ ദൈവത്തോടും, ഏകജാതനായ പുത്രനോടും കൂടി എന്നെന്നും ജീവിച്ചു വാഴുന്ന അങ്ങേക്ക് സ്തുതിയും, മഹത്വവും കൃതജ്ഞതയും എന്നെന്നും ഉണ്ടായിരിക്കട്ടെ ആമ്മേന്‍..

പരിശുദ്ധാത്മാവിന്‍റെ ജപമാല

വിശ്വാസപ്രമാണം