ശരീരത്തിൻറെ വിശുദ്ധി പാലിക്കുക എന്നത് ഒരു ക്രിസ്ത്യാനിയെ സംബന്ധിച്ചിടത്തോളം അതിപ്രധാനമായ കാര്യമാണ്. കാരണം നമ്മുടെ ശരീരം ജ്ഞാനസ്നാനസമയത്ത് പിതാവിൻറെയും പുത്രൻറെയും പരിശുദ്ധാത്മാവിൻറെയും നാമത്തിൽ ആശിർവദിച്ച്, വേർതിരിക്കപ്പെട്ട്, പവിത്രീകരിച്ചതാണ്. ആ ശരീരത്തിലാണു നാം എല്ലാ കൂദാശകളും സ്വീകരിക്കുന്നത്. അതേ ശരീരം തന്നെയാണ് ആശിർവദിക്കപ്പെട്ട കല്ലറയിൽ സംസ്കരിക്കപ്പെടുന്നതും ഉയിർപ്പിക്കപ്പെടുന്നതും. നാം എത്രയോ ഭയത്തോടെ നമ്മുടെ ശരീരത്തെ കാണണം എന്ന് അതിനാൽ തന്നെ വ്യക്തമാണല്ലോ.
ഇനി നമുക്കു ചില തിരുവചനങ്ങൾ വായിക്കാം.
ആസക്തിയോടെ സ്ത്രീയെ നോക്കുന്നവർ ഹൃദയത്തിൽ അവളുമായി വ്യഭിചാരം ചെയ്തുകഴിഞ്ഞു (മത്തായി 5:28)
വേശ്യയുമായി വേഴ്ച നടത്തുന്നവൻ അവളോട് ഏകശരീരമായിത്തീരുന്നു (1 കൊറി 6:16)
വ്യഭിചാരത്തിൽ നിന്ന് ഓടിയകലുവിൻ. മനുഷ്യൻ ചെയ്യുന്ന മറ്റു പാപങ്ങളെല്ലാം ശരീരത്തിനു വെളിയിലാണ്. വ്യഭിചാരം ചെയ്യന്നവനാകട്ടെ സ്വന്തം ശരീരത്തിനെതിരായി പാപം ചെയ്യുന്നു (1 കൊറി 6:18)
നിങ്ങളോരോരുത്തരും സ്വന്തം ശരീരത്തെ വിശുദ്ധിയിലും മാന്യതയിലും കാത്തുസൂക്ഷിക്കേണ്ടതെങ്ങനെയെന്ന് അറിഞ്ഞിരിക്കണം (1 തെസ 4:3-5)
ദുർമോഹങ്ങളിലേക്കു നയിക്കത്തക്കവിധം ശരീരത്തെപ്പറ്റി ചിന്തിക്കാതിരിക്കുവിൻ (റോമാ 13:14)
ജഡികപ്രവണതകൾക്കനുസരിച്ചു ജീവിക്കുന്നവർക്കു ദൈവത്തെ പ്രസാദിപ്പിക്കുക സാധ്യമല്ല (റോമാ 8:8)
ശരീരം ദുർവൃത്തിയ്ക്കുവേണ്ടിയുള്ളതല്ല (1 കൊറി 6:13)
അശുദ്ധിയിലേക്കല്ല, വിശുദ്ധിയിലേക്കാണു ദൈവം നമ്മെ വിളിച്ചിരിക്കുന്നത് (1 തെസ 4:7).
ഈ വചനങ്ങളുടെ ചുരുക്കം ഇത്രയുമേയുള്ളൂ. വ്യഭിചാരം ഒരു വലിയ പാപമാണ്. വ്യഭിചാരം ചെയ്യുന്ന പുരുഷനും സ്ത്രീയും ആ പ്രവൃത്തിയാൽതന്നെ ഒരു ശരീരമായിത്തീരുന്നു. അതായത് ആ പ്രവൃത്തിയ്ക്കു ശേഷം അവരുടെ വികാരവിചാരങ്ങൾ രണ്ടല്ല , ഒന്നായിരിക്കും. കാരണം ഒരു ശരീരത്തിന് ഒരു മനസും ഒരു ചിന്തയും ഒരു ബുദ്ധിയും ഒരു താല്പര്യവും മാത്രമേ ഉണ്ടാകാൻ സാധ്യതയുള്ളൂ. ആസക്തിയോടെ സ്ത്രീയെ/ പുരുഷനെ നോക്കുന്നവർ അതിനാൽ തന്നെ പാപം ചെയ്തുകഴിഞ്ഞു. അതായത് അങ്ങനെ നോക്കുന്ന വ്യക്തി തൻറെ ശരീരത്തിൻറെ വിശുദ്ധിയെ കളങ്കപ്പെടുത്തിക്കഴിഞ്ഞു.
ഈ അശുദ്ധമായ നോട്ടം രണ്ടു വിധത്തിൽ ഉണ്ടാകാം. ഒന്ന് ആരെ നോക്കുന്നുവോ ആ വ്യക്തിയുടെ അറിവോ സമ്മതമോ ഇല്ലാതെ. രണ്ട് ബോധപൂർവം തൻറെ ശരീരത്തിലേക്കു പരപുരുഷൻറെ/ പരസ്ത്രീയുടെ കണ്ണുകൾ ആകർഷിക്കാൻ വേണ്ടി നടത്തുന്ന ശ്രമങ്ങളുടെ ഫലമായി സംഭവിക്കുന്നത്. ആദ്യത്തേതിൽ ആരെ നോക്കുന്നുവോ ആ വ്യക്തി കുറ്റക്കാരനല്ല. കാരണം ആ വ്യക്തിയുടെ മനസിൽ അശുദ്ധമായ ചിന്തയോ താല്പര്യങ്ങളോ ഇല്ല. അശുദ്ധമായ കണ്ണുകളോടെ നോക്കുന്നു എന്നതു പലപ്പോഴും വ്യക്തി അറിഞ്ഞിട്ടുപോലുമുണ്ടാകണമെന്നില്ല.
രണ്ടാമത്തെ ഗണത്തിൽ പെട്ടവരെക്കുറിച്ച് തിരുവചനം ഇങ്ങനെ പറയുന്നു.വിശ്വസിക്കുന്ന ഈ ചെറിയവരിൽ ഒരുവനു ദുഷ്പ്രേരണ നല്കുന്നവൻ (നൽകുന്നവൾ) ആരായാലും അവന് (അവൾക്ക്) കൂടുതൽ നല്ലതു കഴുത്തിൽ ഒരു വലിയ തിരികല്ലു കെട്ടി കടലിൻറെ ആഴത്തിൽ താഴ്ത്തപ്പെടുകയായിരിക്കും ….പ്രലോഭനങ്ങൾ ഉണ്ടാകേണ്ടതാണ്. എന്നാൽ പ്രലോഭനഹേതുവാകുന്നവന് (പ്രലോഭനഹേതുവാകുന്നവൾക്ക്) ദുരിതം (മത്തായി 18:6-7).
അപ്രകാരം മറ്റുള്ളവർക്കു പ്രലോഭനഹേതുവാകത്തക്കവിധം സ്വന്തം ശരീരം പ്രദർശിപ്പിച്ചുകൊണ്ടു നടക്കുന്ന സ്ത്രീയെ (പുരുഷനെയും) , വിശേഷിച്ച് ദൈവാലയം പോലുള്ള വിശുദ്ധസ്ഥലങ്ങളിൽ വരുന്നവരെ, ആത്മീയവേശ്യ എന്നു വിളിക്കുന്നതിൽ തെറ്റില്ല. സ്വന്തം മക്കൾ ഇത്തരത്തിൽ ആത്മീയവേശ്യകൾ ആയിത്തീരാതിരിക്കാൻ മാതാപിതാക്കൾ അതീവശ്രദ്ധ പുലർത്തേണ്ട കാലമാണിത്. ഫാഷൻറെ പേരു പറഞ്ഞു നഗ്നത പ്രദർശിപ്പിക്കുന്ന വസ്ത്രം ധരിക്കാൻ നിങ്ങൾ നിങ്ങളുടെ മക്കളെയോ സഹോദരരെയോ ഭാര്യയെയോ ഭർത്താവിനെയോ എന്നല്ല കുടുംബത്തിൽ ആരെയെങ്കിലും അനുവദിക്കുന്നുവെങ്കിൽ നിങ്ങൾ സ്വയം ശിക്ഷ വിളിച്ചുവരുത്തുന്നു. അതോടൊപ്പം അവരെയും അതേ ശിക്ഷയിലേക്കു വലിച്ചുകൊണ്ടുപോകുന്നു എന്ന് അറിഞ്ഞിരിക്കുക. വിശുദ്ധസ്ഥലങ്ങൾ നഗ്നത പ്രദർശിപ്പിക്കാനുള്ള ഇടമല്ല എന്നു ക്രിസ്ത്യാനിയെ ഇനിയും പറഞ്ഞുപഠിപ്പിക്കേണ്ടിവരുന്നു എന്നതു കഷ്ടമാണ്.
ദുഷ്പ്രേരണയിലേക്കു ശരീരത്തെ വലിച്ചുകൊണ്ടുപോകാൻ പിശാച് ഉപയോഗിക്കുന്ന ആയുധം നമ്മുടെ കണ്ണുകളാണ്. അതുകൊണ്ടു കണ്ണടക്കാം എന്ന പുണ്യം നാം നിർബന്ധമായി പരിശീലിക്കണം. കാരണം കർത്താവ് ഇങ്ങനെ അരുളിചെയ്തിരിക്കുന്നു. ‘നിൻറെ കണ്ണ് നിനക്കു ദുഷ്പ്രേരണയ്ക്കു കാരണമാകുന്നുവെങ്കിൽ അത് ചൂഴ്‌ന്നെടുത്ത് എറിഞ്ഞുകളയുക. ഇരുകണ്ണുകളോടും കൂടി നരകാഗ്നിയിൽ എറിയപ്പെടുന്നതിനേക്കാൾ നല്ലത് ഒരു കണ്ണുള്ളവനായി ജീവനിലേക്കു പ്രവേശിക്കുന്നതാണ്’ (മത്തായി 18:9).പ്രലോഭനഹേതുക്കൾ എപ്പോഴും നമ്മുടെ കൺമുന്നിലുണ്ടാകും. ‘വിശ്വസിക്കുന്ന ഈ ചെറിയവർക്ക് ദുഷ്പ്രേരണ നല്കാൻ വേണ്ടി’ കരുതിക്കൂട്ടി വരുന്ന പിശാചിൻറെ അത്തരം സന്താനങ്ങളിൽ നിന്ന് അകന്നു നിൽക്കുക എന്നതല്ലാതെ കരണീയമായി മറ്റൊന്നുമില്ല.
ചാവറ പിതാവ് ഇങ്ങനെ എഴുതിയിരിക്കുന്നു; ‘ ഇരിപ്പിലും നടപ്പിലും കിടപ്പിലും കളിയിലും വിരക്തി അഥവാ അടക്കമെന്ന പുണ്യം മഹാ സൂക്ഷത്തോടെ അനുസരിക്കുവിൻ. അടക്കമില്ലായ്മ ദൈവതിരുമുമ്പിലും ഈ ലോകത്തിലും വലിയ അപമാനമുള്ളതാകുന്നു. ആൺകുട്ടികൾ വസ്ത്രമില്ലാതെയും പെൺകുട്ടികൾ ചട്ടയിടാതെയും നടക്കുന്നതിനാലും, അവർ തമ്മിൽ തമ്മിൽ ശരീരത്തെ തൊടുന്നതിനാലും, ഇതിനെ കാരണവന്മാർ മുടക്കാത്തതിനാലും, എത്രയോ ആത്മാക്കൾ നരകത്തിൽ വീഴുന്നുണ്ടാകുമെന്ന് വിധിദിവസത്തിൽ അറിയാം ( ഒരു നല്ല അപ്പൻറെ ചാവരുൾ പേജ് 25). തങ്ങളുടെ കുറ്റം നിമിത്തം തങ്ങളുടെ മക്കളിൽ ഒന്നു നരകത്തിൽ നശിച്ചുപോകുമെങ്കിൽ. ഇത് കാരണവന്മാർ രക്ഷപെടുന്നതിന് എത്രയോ തടസമായിരിക്കുന്നു! ( പേജ് 30).
നമ്മുടെ ആത്മരക്ഷയെ ഓർത്തും നമുക്ക് ദൈവം ഏല്പിച്ചുതന്നിരിക്കുന്ന നമ്മുടെ മക്കളുടെ ആത്മരക്ഷ ഓർത്തും വസ്ത്രധാരണത്തിലും പെരുമാറ്റത്തിലും, വിശിഷ്യാ ദൈവാലയത്തിലുള്ള നമ്മുടെ പെരുമാറ്റത്തിനും ഒരു ക്രിസ്ത്യാനിയ്ക്കുതകുന്ന പരിധികൾ പാലിക്കാൻ നമുക്കു ശ്രദ്ധിക്കാം. ഇക്കാര്യത്തിൽ കുഞ്ഞുങ്ങൾക്കു വേണ്ട തിരുത്തലുകളും, ആവശ്യമെങ്കിൽ ശാസനയും നല്കാൻ മാതാപിതാക്കൾക്കെന്നതുപോലെ വൈദികർക്കും സിസ്റ്റേഴ്സിനും മതാധ്യാപകർക്കും കടമയുണ്ട് എന്നുകൂടി ഓർമ്മിപ്പിക്കട്ടെ.