‘ഞാൻ ഭൂമിയ്ക്ക് അടിസ്ഥാനമിട്ടപ്പോൾ നീ എവിടെയായിരുന്നു? നിനക്കറിയാമെങ്കിൽ പറയുക. അതിൻറെ അളവുകൾ നിശ്ചയിച്ചതാരാണ്?’ (ജോബ് 38:4-5). ഇതു ദൈവം മനുഷ്യനോടു ചോദിക്കുന്ന ചോദ്യമാണ്. ദൈവത്തിൻറെ ജ്ഞാനത്തിനു മുൻപിൽ മനുഷ്യൻറെ ബുദ്ധി ഒന്നുമല്ല എന്നതുകൊണ്ടാണു വിശുദ്ധ ഗ്രന്ഥം ഇങ്ങനെ പറയുന്നത്. എന്നിട്ടും മനുഷ്യനു കൂടുതൽ വിശ്വാസം ശാസ്ത്രജ്ഞന്മാരെയാണ്. അവർ പറയുന്ന കാര്യങ്ങൾ ആധികാരികമെന്നു വിശ്വസിക്കാൻ മനുഷ്യർക്ക് ഒരു മടിയുമില്ല. എന്നാൽ അതിനേക്കാൾ വലിയ സത്യങ്ങൾ നൂറ്റാണ്ടുകൾക്കു മുൻപേ ദൈവം മനുഷ്യനു വെളിപ്പെടുത്തിത്തന്നിരുന്നു എന്നു കേൾക്കുമ്പോൾ പലരുടെയും നെറ്റി ചുളിയും.
ഭൂമിയുടെ ഉൾവശത്തിൻറെ ഘടന എങ്ങനെയാണെന്നു ശാസ്ത്രം കണ്ടുപിടിച്ചിട്ടു കുറച്ചുവർഷങ്ങളേ ആയിട്ടുള്ളൂ. 5200 ഡിഗ്രി ചൂടിൽ തിളച്ചുമറിയുന്ന ഇരുമ്പും നിക്കലും ചേർന്നതാണ് ഭൂമിയുടെ ഉൾവശം എന്ന് ഇപ്പോൾ ശാസ്ത്രജ്ഞൻമാർ പറയുന്നു. എന്നാൽ രണ്ടായിരത്തി അഞ്ഞൂറു വർഷം മുൻപു ബൈബിളിൽ ഇങ്ങനെ എഴുതിയിരിക്കുന്നു. ‘ ഭൂമിയുടെ അധോഭാഗം അഗ്നിയാലെന്നപോലെ തിളച്ചുമറിയുന്നു (ജോബ് 28:5).
ഭൂമിയെ ശൂന്യതയിൽ തൂക്കിയിട്ടിരിക്കുകയാണ് ( ജോബ് 26:7 ) എന്നു ബൈബിൾ പറഞ്ഞിട്ടു രണ്ടര സഹസ്രാബ്ദം കഴിഞ്ഞപ്പോൾ ശാസ്ത്രജ്ഞന്മാർ അതു ശരിയാണെന്ന് സമ്മതിച്ചു. മറ്റു യാതൊന്നിൻറെയും സഹായമില്ലാതെ ഭൂമി ശൂന്യതയിൽ സ്ഥിതിചെയ്യുന്നതു ഗുരുത്വാകർഷണബലം കൊണ്ടാണെന്ന് ഇന്നു നമുക്കറിയാം. ആകാശത്തിലെ ആകെ നക്ഷത്രങ്ങളുടെ എണ്ണം മൂവായിരത്തിനടുത്തു മാത്രമാണെന്ന ടോളമിയുടെ ( BC രണ്ടാം നൂറ്റാണ്ട്) സിദ്ധാന്തം പ്രചരിക്കുന്നതിനും നൂറ്റാണ്ടുകൾക്കു മുൻപേ ആകാശത്തിലെ നക്ഷത്രങ്ങൾ എണ്ണമറ്റവയാണെന്നു പലതവണ ബൈബിളിൽ എഴുതിയിരിക്കുന്നു (ഉൽ 15:5, ജെറ 33:22). ആകാശത്തിലെ നക്ഷത്രങ്ങളെ എണ്ണിത്തിട്ടപ്പെടുത്താമെന്ന പ്രതീക്ഷ ഇന്നു ശാസ്ത്രം പോലും ഉപേക്ഷിച്ചുകഴിഞ്ഞിരിക്കുന്നു. തങ്ങൾ പറയുന്നത് ഒരു ഏകദേശകണക്കു മാത്രമാണെന്ന് അവർ സമ്മതിക്കുന്നു.
ഭൂമിയ്ക്ക് ഗോളാകൃതി ആണെന്നതിൻറെ സൂചനകൾ BC എട്ടാം നൂറ്റാണ്ടിൽ എഴുതിയ ഏശയ്യാ പ്രവചനത്തിലും അഞ്ചാം നൂറ്റാണ്ടിനും ഏഴാം നൂറ്റാണ്ടിനും ഇടയിൽ എഴുതിയ ജോബിൻറെ പുസ്തകത്തിലും കാണാം. ‘പ്രകാശത്തിൻറെയും അന്ധകാരത്തിൻറെയും അതിർത്തിയിൽ ജലോപരിതലത്തിൽ അവിടുന്ന് ഒരു വൃത്തം വരച്ചിരിക്കുന്നു’ ( ജോബ് 26:10) എന്ന വചനം ശ്രദ്ധിക്കുക. ഭൂമിക്കു മുകളിൽ ആകാശവിതാനത്തിന് ഉപരി ഉപവിഷ്ടനായിരിക്കുന്നവനാണ് അവിടുന്ന് (ഏശയ്യാ 40:22) എന്നതിൻറെ മൂലരൂപത്തിൽ വൃത്തം/ ഗോളം എന്ന അർഥം വരുന്ന circle/ sphere/ globe of the earth എന്നാണുള്ളത്. അതിൻറെയർത്ഥം ഭൂമി ഗോളാകൃതിയാണെന്നതുതന്നെയാണ്.
വലിയൊരു ആണവ യുദ്ധം ഉണ്ടാവുകയാണെങ്കിൽ അതിൻറെ ഫലമായി നീണ്ടുനിൽക്കുന്ന ആണവശൈത്യം ഭൂമിയിൽ ഉണ്ടാകുമെന്നും ഭൂമിയിലെ താപനില ശരാശരി എട്ടു ഡിഗ്രി വരെ താഴ്ന്നുപോകാമെന്നും നമുക്കറിയാം. യുദ്ധത്തിൻറെ ഫലമായി ശൈത്യം ഉണ്ടാകുമെന്ന് ആദ്യം പറഞ്ഞതു ശാസ്ത്രമല്ല, ബൈബിളാണ്. ‘പീഡനത്തിൻറെയും യുദ്ധത്തിൻറെയും നാളുകളിലേക്കു വേണ്ടി ഞാൻ കരുതിവച്ചിരിക്കുന്ന ഹിമത്തിൻറെ ഭണ്ഡാരത്തിലേക്കു നീ ചെന്നിട്ടുണ്ടോ?’ (ജോബ് 38:22) എന്നു കർത്താവ് മനുഷ്യനോടു ചോദിച്ചതു രണ്ടായിരത്തി അഞ്ഞൂറു വർഷം മുൻപാണ്. യുദ്ധത്തിൻെറ നാളിലേക്കു വേണ്ടിത്തന്നെ കരുതിവച്ചിരിക്കുന്നതാണത് എന്നു പ്രത്യേകം പറഞ്ഞിരിക്കുന്നു.
ഭൂമിയുടെ വിശാലത നീ ഗ്രഹിച്ചിട്ടുണ്ടോ ? (ജോബ് 3818) എന്നു കർത്താവ് ചോദിക്കുന്നു. വെളിപാട് പുസ്തകത്തിൽ സ്വർഗീയജെറുസലേമിൻറെ അളവുകൾ കൊടുത്തിരിക്കുന്നതു ശ്രദ്ധിക്കുക. ‘നഗരം സമചതുരമായിസ്ഥിതി ചെയ്യുന്നു. അതിനു നീളത്തോളം തന്നെ വീതി. അവൻ ആ ദണ്ഡ് കൊണ്ടു നഗരം അളന്നു. പന്തീരായിരം സ്താദിയോൺ (stadia). അതിൻറെ നീളവും വീതിയും ഉയരവും തുല്യം’ (വെളി 21:16)
പന്തീരായിരം സ്താദിയോൺ എന്നത് ഏതാണ്ട് 2250 കിലോമീറ്റർ ആണ്. അങ്ങനെയെങ്കിൽ സ്വർഗീയജെറുസലേമിൻറെ ഉപരിതലവിസ്തീർണം 2250 x 2250 = 5062500 ചതുരശ്ര കിലോമീറ്റർ (square kilometer) ആണ്. ഇത് ഭൂമിയുടെ ആകെ ഉപരിതലവിസ്തീർണത്തിൻറെ ഒരു ശതമാനമാണ് (കൃത്യമായി പറഞ്ഞാൽ 0. 9925%). ഇനി അതിൻറെ വ്യാപ്തം (volume) 2250 x 2250 x 2250 = 11390625000 ഘനകിലോമീറ്റർ (cubic kilometer) ആണ്. ഇതു ഭൂമിയുടെ വ്യാപ്തത്തിൻറെ ഒരു ശതമാനമാണ് (കൃത്യമായി പറഞ്ഞാൽ 1.05%). ഇത് എഴുതിയതു ‘വിദ്യാവിഹീനനും സാധാരണക്കാരനുമായ’ (അപ്പ. 4:13) യോഹന്നാൻ എന്നൊരാളാണ്. നാടുകടത്തപ്പെട്ട് ഒരു ദ്വീപിൽ ആയിരിക്കുമ്പോഴാണ് അദ്ദേഹം ഇതെഴുതുന്നത് എന്നും ഓർക്കണം.
ആകാശഗോളങ്ങൾ നീങ്ങുന്നതും ഭൂമിയിലെ വസ്തുക്കൾ പെരുമാറുന്നതും ഒരേ നിയമത്തിൻറെ അടിസ്ഥാനത്തിലാണെങ്കിലും വ്യത്യസ്ത രീതിയിലാണെന്നു ശാസ്ത്രം പറയുന്നതിനും എത്രയോ മുൻപ് ദൈവം പറഞ്ഞുതന്നിരുന്നു. ‘ആകാശത്തെ നിയന്ത്രിക്കുന്ന ചട്ടങ്ങൾ നിനക്കറിയാമോ? നിനക്കതു ഭൂമിയിൽ പ്രയോഗിക്കാമോ?’ ( ജോബ് 38:33).
ദൈവത്തിൻറെ വചനം സജീവവും ഊർജസ്വലവും ഇരുതലവാളിനേക്കാൾ മൂർച്ചയുള്ളതും, ചേതനയിലും ആത്മാവിലും സന്ധിബന്ധങ്ങളിലും തുളച്ചുകയറി ഹൃദയത്തിൻറെ വിചാരങ്ങളെയും നിയോഗങ്ങളെയും വിവേചിക്കുന്നതുമാണ് (ഹെബ്രാ 4:12) എന്നു വിശ്വസിക്കാൻ നമുക്കു മടിയാണ്. എന്നാൽ ultrasound sonographyയിൽ ഉയർന്ന ആവൃത്തിയിലുള്ള ശബ്ദതരംഗങ്ങൾ (വചനം എന്ന വാക്ക് ഓർക്കുക) ശരീരത്തിൻറെ ഉള്ളിൽ കടന്നുചെന്നു നമ്മുടെ ആന്തരികാവയവങ്ങളുടെ അവസ്ഥ തൽസമയം വിവേചിച്ചറിയുന്നു എന്നു വിശ്വസിക്കാൻ ഒരു മടിയുമില്ല.
‘ദൈവത്തിൻറെ മുൻപിൽ ഒരു സൃഷ്ടിയും മറഞ്ഞിരിക്കുന്നില്ല. അവിടുത്തെ കണ്മുൻപിൽ സകലതും അനാവൃതവും വ്യക്തവുമാണ്’ (ഹെബ്രാ 4:13) എന്നറിഞ്ഞിരുന്നിട്ടും നാം ദൈവത്തെ കബളിപ്പിക്കാൻ ശ്രമിക്കുന്നു. എന്നാൽ നമ്മുടെ ഉള്ളിലുള്ള സകലതും അനാവൃതവും വ്യക്തവുമായി ചിത്രീകരിച്ചുകാണിക്കുന്ന എക്സ് റേയും സ്കാനിങ്ങും സത്യമാണെന്നു നമ്മൾ സമ്മതിക്കുകയും ചെയ്യുന്നു. മരണസമയത്ത് വിശദീകരിക്കാനാകാത്ത ഒരു ഊർജ്ജം ശരീരത്തിൽ നിന്നു പുറത്തേക്കു പോകുന്നതായി ശാസ്ത്രം കണ്ടെത്തിയിട്ടുണ്ട്. എന്നാൽ അതിനെ ആത്മാവ് എന്നു വിളിക്കാൻ നമുക്കു മടിയാണ്.
പിശാച് ഉണ്ടെന്നും പിശാച് മനുഷ്യൻറെ പ്രവൃത്തികളെ നിയന്ത്രിക്കാൻ ശ്രമിക്കുമെന്നും ബൈബിളിൽ പറഞ്ഞിട്ടുളളതു വിശ്വസിക്കാൻ നമുക്കു മടിയാണ്. എന്നാൽ അജ്ഞാതമായ ഏതോ വിദൂരഗ്രഹത്തിലെ ജീവികൾ (aliens ) നമ്മെ നിരീക്ഷിക്കുകയും നിയന്ത്രിക്കാൻ ശ്രമിക്കുകയും ചെയ്യുന്നുണ്ടെന്നു ശാസ്ത്രം പറയുമ്പോൾ നമുക്ക് അതിൽ ഒരു സംശയവുമില്ല. നിത്യത അഥവാ സമയം നിശ്ചലമാകുന്ന ഒരവസ്ഥ ഉണ്ടെന്നു ബൈബിൾ പറയുമ്പോൾ വിശ്വസിക്കാൻ മടി. കർത്താവിൻറെ മുൻപിൽ ഒരു ദിവസം ആയിരം വർഷങ്ങൾ പോലെയും ആയിരം വർഷങ്ങൾ ഒരു ദിവസം പോലെയും ആണെന്ന് ബൈബിൾ പറയുമ്പോഴും ( 2 പത്രോസ് 3:8) വിശ്വാസം വരുന്നില്ല . എന്നാൽ സമയം ആപേക്ഷികമാണെന്ന് ഐൻസ്റ്റെൻ പറഞ്ഞപ്പോൾ നമുക്കു സന്തോഷമായി.
ഭൂമിയുടെ അവസാനം അഗ്നികൊണ്ടോ അസഹനീയമായ ചൂടു കൊണ്ടോ ആയിരിക്കുമെന്നതു ശാസ്തജ്ഞന്മാർ തന്നെ മുന്നോട്ടു വയ്ക്കുന്ന ചിന്തയാണ്. ‘മൂലപദാർത്ഥങ്ങൾ എരിഞ്ഞുചാമ്പലാകും. ഭൂമിയും അതിലുള്ള സമസ്തവും കത്തിനശിക്കും . …ആകാശം തീയിൽ വെന്തുരുകും’ ( 2 പത്രോസ് 3:10-12) എന്നു ബൈബിളിൽ പ്രവചിച്ചിട്ടു രണ്ടായിരം വർഷമാകുന്നു. ഒരു ആണവയുദ്ധത്തിലാണെങ്കിൽ ഭൂമി നശിക്കുന്നത് അഗ്നി കൊണ്ടായിരിക്കും എന്നുറപ്പാണ്. അതും ശാസ്ത്രം പറയുമ്പോഴേ
നാം വിശ്വസിക്കുന്നുള്ളൂ എന്നതാണു പ്രശ്നം.
ദൈവം സർവ്വജ്ഞാനിയാണെന്നു വിശ്വസിക്കാൻ മടി. മനുഷ്യൻറെ സൃഷ്ടിയായ ഒരു സൂപ്പർ കംപ്യുട്ടറിൻറെ കഴിവുകൾ അംഗീകരിക്കാൻ നമുക്ക് ഒരു മടിയുമില്ല. Artificial Intelligence (നിർമ്മിതബുദ്ധി) നമ്മുടെ എല്ലാ ചോദ്യങ്ങൾക്കും മറുപടി തരും എന്ന് അംഗീകരിക്കാനും മടിയില്ല. അപ്പോൾ ദൈവമോ?
പുരാതനകാലത്ത് മനുഷ്യർ എല്ലാവരും ഒരേ ഭാഷയാണ് സംസാരിച്ചിരുന്നതെന്നും ( ഉൽ 11:1) എന്നാൽ മനുഷ്യൻ ദൈവത്തെ വെല്ലുവിളിച്ചുകൊണ്ട് ഷിനാർ സമതലത്തിലെ ( ഇപ്പോഴത്തെ ഇറാക്ക്) ബാബേലിൽ ആകാശം മുട്ടുന്ന ഒരു ഗോപുരം പണിയാൻ തൂടങ്ങിയപ്പോൾ ദൈവം അവരുടെ ഭാഷകൾ ഭിന്നിപ്പിച്ചു എന്നും ബൈബിളിൽ പ്രസ്താവിച്ചിരിക്കുന്നതു (ഉൽ 11:7-8) വിശ്വസിക്കാൻ മടി. എന്നാൽ ലോകത്തിലെ 42% പേരുടെ മാതൃഭാഷകൾ ഉൾക്കൊള്ളുന്ന ഇൻഡോ- യൂറോപ്യൻ ഭാഷാകുടുംബത്തിലെ എല്ലാ ഭാഷകളും ( നിലവിൽ അതിൽ 446 സജീവഭാഷകളുണ്ട്) ഒരു പൊതു പൂർവിക ഭാഷയിൽ നിന്നാണ് ഉത്ഭവിച്ചതെന്നു പണ്ഡിതന്മാർ ഇന്ന് അംഗീകരിക്കുന്നു. ഭാഷാവിഭജനം സംഭവിച്ചത് BC 3300 -1200 കാലഘട്ടത്തിനിടയിലാണെന്നും അവർ പറയുന്നു. BC പത്തൊൻപതാം നൂറ്റാണ്ടിൽ ജീവിച്ചിരുന്ന അബ്രാഹാമിനും അനേകം തലമുറകൾക്കു മുൻപാണ് ബാബേൽ ഗോപുരത്തിൻറെ നിർമാണം എന്നും കിഴക്കുനിന്നു വന്നവരാണ് അതു പണിതതെന്നും (ഉൽ 11:2) കൂടി ബൈബിൾ പറയുന്നുണ്ട് .
ദൈവത്തെ സംബന്ധിച്ചിടത്തോളം ഇരുട്ടു പ്രകാശം പോലെതന്നെയാണെന്നു ബൈബിൾ പറയുമ്പോൾ (സങ്കീ 139:12) വിശ്വസിക്കാൻ മടി. എന്നാൽ Infrared രശ്മികൾ ഉപയോഗിച്ച് ഇരുട്ടത്തുള്ള വസ്തുക്കളെപ്പോലും കാണാൻ സാധിക്കും എന്നു ശാസ്ത്രം തെളിയിച്ചപ്പോൾ നമുക്കു സംശയമേയില്ല. ദൈവം മനുഷ്യരുടെ പ്രവൃത്തികൾക്കെല്ലാം കണക്കുവയ്ക്കുമെന്നും പ്രവൃത്തികൾക്കനുസരിച്ച് മരണശേഷം പ്രതിഫലം നൽകുമെന്നും ബൈബിൾ പറയുമ്പോൾ എണ്ണൂറു കോടി ജനങ്ങളുടെ നാൾവഴി എഴുതിവയ്ക്കാൻ ദൈവത്തിനെങ്ങനെ സാധിക്കും എന്നാണു പലരുടെയും സംശയം. ഒരു ചെറിയ ചിപ്പിൽ മില്യൺ കണക്കിന് (ഒരു മില്യൺ =പത്തുലക്ഷം) ട്രാൻസിസ്റ്ററുകൾ ഉണ്ടെന്നും ഒരു സെക്കൻഡിൽ ട്രില്യൺ കണക്കിന് (ഒരു ട്രില്യൺ = 10 എന്നെഴുതിയിട്ട് അതിനുശേഷം പതിനൊന്ന് പൂജ്യങ്ങൾ ചേർത്താൽ കിട്ടുന്ന സംഖ്യ) കണക്കുകൂട്ടലുകൾ നടത്താൻ കഴിയുന്ന ചിപ്പുകൾ ഇപ്പോൾ തന്നെ നിലവിലുണ്ടെന്നും വിശ്വസിക്കാമെങ്കിൽ എണ്ണൂറു കോടി മനുഷ്യരുടെ കണക്കെഴുതുക എന്നത് എത്രയോ നിസാരകാര്യമാണ് എന്നു ചിന്തിക്കുക.
ഒരു പ്രതിമയ്ക്ക് ജീവശ്വാസം കൊടുക്കുന്നതും ആ പ്രതിമയ്ക്കു സംസാരശക്തി ലഭിക്കുന്നതും സംഭവിക്കാൻ പോകുന്ന കാര്യമാണെന്നു വെളിപാട് പുസ്തകത്തിൽ എഴുതിവച്ചത് ( വെളി 13:15) വിശ്വസിക്കാൻ മടി. എന്നാൽ ഇന്ന് AI യുടെ സഹായത്തോടെ ആരുടേയും ചിത്രം നിർമ്മിച്ച് അവരുടെ സംസാരവും കേൾപ്പിക്കാൻ സാധിക്കും എന്നതിൽ നമുക്കു സംശയമില്ല. അരൂപികളായ മാലാഖമാർ മനുഷ്യരോടു സംസാരിച്ചു എന്നു വിശ്വസിക്കാൻ മടി. എന്നാൽ സ്ക്രീൻ ഇല്ലാതെ തന്നെ അന്തരീക്ഷത്തിൽ ചിത്രങ്ങൾ പ്രൊജക്റ്റ് ചെയ്തു നിർത്താവുന്ന holographic technologyയും ലേസർ technology യും സാധ്യമാണെന്നു വിശ്വസിക്കാൻ ബുദ്ധിമുട്ടില്ലതാനും.
അപ്പോൾ പ്രശ്നം എവിടെയാണ്? അതു യോഹന്നാൻ ശ്ലീഹാ പറഞ്ഞിട്ടുണ്ട്. ‘ സത്യാത്മാവ് വരുമ്പോൾ നിങ്ങളെ സത്യത്തിൻറെ പൂർണതയിലേക്കു നയിക്കും’ (യോഹ. 16:13). വിശ്വാസം എന്നതു പരിശുദ്ധാത്മാവ് നൽകുന്ന കൃപയാണ്. ആ കൃപ കിട്ടിയാൽ എല്ലാ സംശയങ്ങളും നീങ്ങിപ്പോകും. വിശ്വാസം ഇല്ലാത്തവർക്കു ലോത്തിൻറെ മരുമക്കളെപ്പോലെ എല്ലാം തമാശയായേ തോന്നുകയുള്ളൂ (ഉൽ 19:14) എന്നിടത്താണു പ്രശ്നം. വിശ്വാസത്തോടൊപ്പം ജ്ഞാനത്തിൻറെ കൃപയും കിട്ടുമ്പോൾ നമുക്ക് ബൈബിളിലെ പ്രവചനങ്ങളുടെ അർഥം തെളിഞ്ഞുകിട്ടും. അതിനായി നമുക്കു പ്രാർഥിക്കാം.
(www.divinemercychannel.com)